勇武羅定人再證香港政棍搬龍門

 - Ronald Chiu @ 04-12-2015

 香港的左膠、政棍、偽學者思維高深莫測，我哋識條鐵咩？太陽花學運同雨傘革命，已經証明咗佢哋係雙重標準。批評香港打爛立法會玻璃和反走私的示威者時，佢哋個個「聖人上身」咁款。但前幾日大陸「羅定人勇武抗爭成功」單嘢，示威者又佔路又破壞公物，佢哋全部視而不見，個個粒聲唔出。 嗰班「知名網絡批評員」呢？ •　點解庫斯克唔話羅定人損壞公物係「殺紅了眼」，PR要「扣二百分」？ •　陳景輝唔話示威者係「無責任的雞蛋」同「法西斯」，話佢哋「與藍絲帶同一個模倒出來」？ •　點解蕭若元唔譴責有人「教唆暴力」，問人是否可以承擔後果？佢哋又係唔係熱狗，受雙黃一陳指使？ •　林兆彬又唔講「行動淪為情緒發洩，失去中間派支持，消耗良好公民素質」？ •　做乜區家麟唔問羅定人「究竟應該反誰」，「應該針對政策」，而非堵路、損壞公物，希望羅定人可「易地而處」，想想「無奈」的市政府？ 香港「和理非」嘅政棍去咗邊？ •　張超雄又唔譴責「暴力」，話羅定示威者「自以為正義便行事不擇手段」？兩錯不能成一善（Two wrongs don't make a right）喎！ •　陳偉業唔講吓羅定人示威係「黑豹」，話佢哋之後會變成「恐怖分子、支持暗殺」？ •　泛民多個議員支持太陽花學運，但香港打爛立法會玻璃又「鬼殺咁嘈」，去到「羅定事件」又毫無姿態。不只是「雙重標準」，係「三重標準」。乜唔係應該幾時都要「和理非」咩？ 其他意見領袖同學界知識分子呢？ •　點解陳日君唔話咁做大陸會出解放軍？解放軍喺羅湖橋以北，出兵唔使過關，應該快到過去香港喎。 •　做乜周保松唔話羅定市政府官員係「為勢所迫」，「成件事係政策導致」？做乜唔叫示威者做「是非不分的懦夫勇武派」？ •　點解沈校長唔勸吓呢班孩子「是時候回家了」？「假若不幸發生傷亡」，佢「將一生遺憾」？ •　做乜周永康唔講下點解一個示威「升級」，其實係有用？咁今次係咪又「反證咗」咩「用升級做主軸」？ •　黃之鋒呢？羅定示威者勇武成功，係唔係因為佢地有錢「買軍火」？ 你覺得佢哋唔出聲係因為唔關心大陸，但關心香港……真係咁？假如上述的「道德聖人」真是因為佢哋所講的道德原因批評「激進行為」，佢哋係唔會因為件事喺邊度發生而改變佢哋嘅立場，由「慷慨激昂、義正辭嚴」變成「默不作聲、視若無睹」。 除非佢哋一開始就有兩個龍門。 香港遲早衰過大陸。大陸如立惡法，政府主要用「封鎖新聞」去控制群眾。香港呢？有咗呢班離地中產、偽學者、學棍、政棍搞維穩，港共政府可謂安枕無憂。港人慣性聽左膠和政棍們的謬論，新聞不需要被封鎖就個個叫你跪低。有呢班「維穩大軍」，所以梁振英政府越來越肆無忌憚。你哋唔見香港新聞一日比一日荒膠？雙非問題、國教、電視發牌、邊境走私、反歧視法、陸生問題、普教中、東北撥款、辱警罪、三跑……每一件新聞都荒謬，每一件香港人都知道。 佔領時的大台和糾察，是控制群眾的維穩兵。但他們其實仍然是陰魂不散，搞散了雨傘革命仍要向港人步步進逼。這個看不見的大台，這班無形的糾察隊，是用偽道德的「緊箍咒」去撲殺港人的自救意識。必須撕破他們的假面具！