警察總長自白書
2011-09-04
【明報專訊】首先係我個名，其實我幾介意市民叫我做「一哥」嘅。呢個係同事嘅叫法，有啲親切，亦有啲滿州綠營嘅八旗feel，重有啲extra嘅江湖幫會味，但最好是自己人講囉。市民又唔係我伙記，叫乜嘢一哥啫？更何况，外邊快餐店啲一人孤獨火鍋，竟然無尊重到我，叫「一哥火鍋」喎，剩得我一個人獨自食火鍋，無晒伙計傍住，好似被迫提前退休咁，好大鑊o架嘛，真係唔好意頭。

好心叫我做「警察長」啦
警務處長個名都好客觀平實，主理警察事務，但警務、稅務、水務、民政事務之類，有些平凡，香港海關嘅首長，都叫「關長」啦，好古老嘅，差一個字就係是「關雲長」嘞，同關帝君有緣，所以海關從無出事。可惜呢，警長唔講得，警長只係一般嘅沙展，唯有加一個「總」字，好似民國稱呼，叫「警察總長」，簡稱「警察長」，都好夠威嚴。

個名好緊要，有了個威威嘅名，應該多人尊重，唔使作威作福，你幾時見過海關關長、公立圖書館長出來施威？香港嘅行政長官、簡稱特首，都係改壞個名，叫「行政官長」吖嘛！簡稱「官長」，眾官之長，好似玉皇大帝咁，又或者，衰到極都係海龍王座下嗰位龜丞相吖，你話幾威呢？只不過，北京唔會畀呢啲名香港o架嘞，渠地個阿頭都係叫做「主席」同「總書記」咋。主席同埋書記，深水埗街坊會都有啦。所以話，九七之後，總督呀、按察司呀、布政司呀、保安司呀，乜嘢都要掃走，連我件威威制服同皇冠都無埋，變作保安阿頭。

叫得我做「一哥」，就要認契弟

正如阿陳雲話齋，正名呀，名實相符，名不正則言不順。啲香港人自己搵自己笨，你哋叫得我做一哥，你哋班記者自己認做我契弟，我咪做啲一哥嘅嘢過你地歎吓囉。遮擋攝影鏡頭，我已經用黑影論來解釋，畀足面你哋班自認契弟嘅報紙佬o架嘞。

港大單嘢，校園搞保安——或者跟大陸叫「安保」啦，唔係官家地方，又唔係私人地方，認真惡鯁，咁你香港大學要攞威，要做咁唔安全嘅行為，我咪唯有幫你戴安全套囉，全程密封式管理，潑水不入，李克強副總理紋風不動，好啦掛？威你港大攞盡，獎學金呀、線裝書呀、地產富豪呀、前港督呀，真係乜都有，鑊就要我哋孭，無義氣囉。好心你哋當日管束好班學生，或者之前訓誨吓，同學生通吓聲氣，學吓大陸，做吓「思想工作」，你港大食得人茶禮，梗要低聲下氣？學生要示威都等李副總走咗先做，我哋循例作狀阻攔吓、引導吓就得啦，大家好做人，使乜搞到要推入後樓梯，畀港大保安看管咁難睇呢？港大攞盡威，出咗事，扮清高，要我一個人死頂，好橙啊！

港大點解唔請高錕？
自從曾蔭權玩潛水，唐英年玩完戇居之後，北大人發狼戾，要我死撳住，鬼咩，如今香港地，無公屋無居屋無工廠無廉租商場，大學畢業賺六七千、住棺材房，我哋警察就話有份安樂茶飯，小市民有條毛啊？唔出來示威，條氣點順得番？你政府唔搞好民生，靠我維持保安喎，呢啲咪叫做mission impossible囉。有戲你睇噶，Mission Impossible最後嗰場，一定係警察長呀、國防部長呀、CIA阿頭之類，要上國會交代，面對質詢，之後上埋法庭，從此收工囉，坐監囉。啲臥底、便衣、黑衫客，一定無事。我如今先知，做臥底最安全，出面做阿頭，下屬做錯事，就要自己孭；隔籬香港大學做錯事，都係我孭。

講埋麗港城單嘢先。私人地方，有副總理駕到，市民都會識做，話晒香港有一半人食過蛇宴、盆菜，親民建聯o架嘛？雖然之前只有兩個鐘頭準備，但麗港城保安部都話OK，派多啲便衣囉，本來都可以過到骨，又係啲住客大帝唔畀面。喂，你哋叫得我做一哥，認得自己做契弟，就合作吓啦喂。著乜嘢六四T恤啫？六四你都可以著，但嗰日、嗰個場合，好心你咪令我難做人啦。我唔擋住，日後我點接大陸啲「安保」任務來做？

整件事，話到底，都係香港大學搞出來，無端端，請乜嘢大陸領導人落來主持一百周年呢？請克林頓唔得咩？昂山素姬呀，曼德拉都得，點解要中央領導人呢？高錕都夠照啦，療養院推架輪椅過來就掂，飛機票都唔使，輪椅駕到，全場起立，你話幾感人呢？搞咁多嘢把鬼呀？明知呢排示威，興嗰味直接行動、現場搞嘢，一捉人就甩裙甩褲嗰啲，唔再玩和平抗議。影片上載YouTube流行，記者又唔可以無自己啲獨家片段，李副總要入大學，我都知必定大鑊，已經封山封路，點知一樣出事。你自己請中央領導人落來，自己又唔做好校園調解同保安，出事我負責，你個校長咪好好做？

都係「校長」個名夠威
咪係囉。「校長」吖嘛，有名你叫，簡單有力，威嚴過人，出事就梗係由我呢個「警務處長」來孭啦，鬼叫我有個「務」字？做service，鐵馬擔擔抬抬，庶務組咋。好似禿鷹個名咁，你估好威呀？魚鷹食魚，麻鷹食蛇，貓頭鷹都有新鮮老鼠食，禿鷹食乜呀？食死屍咋，而且重要係啲獅子呀、虎豹呀、豺狼呀食完之後，番個棚骨咋。幫啲達官貴人做埋晒啲dirty jobs，現場做cleaner，之後「唔該」都無句，仲要推我上立法會解釋，前後左右潛晒水，我押尾陣，變咗打頭陣，遲早輪到我做sorry sir，真係擔心到我頭毛又甩多幾條呀。